Nokkrir hlutir hafa ávallt vakið furðu mína þrátt fyrir að flokkast sem endurtekið efni. Eitt af þessu er lyktin sem sest í handarkrikana á bolum úr bómull eða gerviefnablöndum. Hvers vegna lyktar þetta alltaf eins og að köttur hafi komið við og migið á þvottinn og miðað sérstaklega á handarkrikana?
Svo var það fyrir tæpum áratug síðan, þegar ég var ennþá skemmtileg og nennti að fara á barinn, að ég velti því fyrir mér eftir hverja einustu helgi hvaða gráa drulla var alltaf á skónum mínum. Þetta var hin svokallaða ,,Sirkusleðja"; Ljósgrá og þaulsetin. Ég lét því miður aldrei verða af því að fara með sýni í rannsókn. Eitthvað segir manni samt að þetta hafi verið blanda af áfengi, slabbi, sígarettuösku og hlandi. Mig grunar það allaveganna.
Æ, ef allir hefðu jafn mikinn tíma og ég. Þá væri internetið þungt af áhugaverðum frásögnum og vangaveltum um mikilvæga hluti.
Engin ummæli:
Skrifa ummæli